క్షమించడం ఒక మానవ హక్కు - క్రైస్తవ విధి: సిరాకు 27:33—28:9; రోమా 14:7-9; మత్తయి 18:21-35 (24/ A)

క్షమించడం ఒక మానవ హక్కు - క్రైస్తవ విధి

సిరాకు 27:33—28:9; రోమా 14:7-9; మత్తయి 18:21-35 (24/ A)

“నీ పొరుగువాని అన్యాయమును క్షమించుము. అప్పుడు నీవు ప్రార్థన చేయునప్పుడు నీ పాపములు క్షమింపబడును” (సిరాకు  28:2)

 

పేతురు యేసును, “ప్రభువా, నా సహోదరుడు నాకు విరోధముగా పాపము చేసినయెడల నేను ఎన్నిసార్లు క్షమించవలెను? ఏడుసార్లు క్షమించాలా?” అని అడిగాడు. యేసు, “ఏడుసార్లు కాదు, డెబ్బై ఏడుసార్లు” అని జవాబిచ్చాడు (మత్త 18:21-22). యేసు మనకు ఒక గణిత సంఖ్యను ఇవ్వడం లేదు, కానీ క్షమించడాన్ని ఒక జీవన విధానంగా చేసుకోమని అడుగుతున్నాడు. గ్రీకు పదబంధం ἑβδομηκοντάκις ἑπτά (హేబ్దోమేకొంటకిస్), అక్షరాలా, “డెబ్బై సార్లు ఏడు,” అంటే అంకగణితానికి పరిమితం కానిది. ఇది లెక్కలు లేకుండా క్షమించడాన్ని సూచిస్తుంది. “డెబ్బై” అనే సంఖ్యకు బైబిల్‌లో కూడా లోతైన ప్రాముఖ్యత ఉంది. హీబ్రూలో, “డెబ్బై” అనేది שִׁבְעִים (షివీం), ఇది “ఏడు” అనే సంఖ్య, שֶׁבַע (షేవ) పు బహువచన రూపం. బైబిల్‌లో, “ఏడు” తరచుగా “నిండుదనం” లేదా “సంపూర్ణతను” సూచిస్తుంది. అందువల్ల, “డెబ్బై” అనేది విస్తృతమైన లేదా సంపూర్ణమైన కొలతను వ్యక్తపరచగలదు.

 

నోవహు నుండి డెబ్బై జాతులు వచ్చాయి (ఆది 10). ఇది మానవజాతి పరిపూర్ణతను సూచిస్తుంది. ఇశ్రాయేలును నడిపించే బాధ్యతను పంచుకోవడానికి మోషే డెబ్బై మంది పెద్దలను నియమించాడు (సంఖ్యా 11:16–17). యేసు డెబ్బై మందిని—లేదా డెబ్బై ఇద్దరిని—శిష్యులుగా పంపాడు (లూకా 10:1). ఇది సకల ప్రజల పట్ల సువార్త పరిచర్యకు ప్రతీక. దానియేలు గ్రంథంలో, డెబ్బై వారాలు దేవుని రక్షణ ప్రణాళికలోని ఒక సంపూర్ణ కాలాన్ని సూచిస్తాయి (దానియేలు 9:24). అందువల్ల యేసు బోధ పరిమిత సంఖ్యలో క్షమాపణ చర్యలకు మించి విస్తరించింది. దేవుని సార్వత్రిక కరుణలో పాలుపంచుకోమని ఆయన మనలను పిలుస్తున్నాడు. క్షమాపణ అనేది మన కుటుంబం, దేశం, మతం లేదా సామాజిక సమూహానికి చెందిన వారికి మాత్రమే అందించకూడదు. ఇది మొత్తం మానవ కుటుంబం వైపు మళ్ళించబడిన యేసు బృహత్తరమైన  ఒక పిలుపు.

 

అదే సమయంలో, క్షమించడం అంటే అన్యాయాన్ని తిరస్కరించడం, దుర్వినియోగాన్ని అనుమతించడం, హింసను విస్మరించడం లేదా న్యాయమైన బాధ్యతను తొలగించడం కాదు. క్రైస్తవ క్షమాపణ సత్యం, న్యాయం, జవాబుదారీతనం మరియు పునరుద్ధరణను కోరుతుంది. జరిగిన తప్పును ఒప్పుగా ప్రకటించకుండానే మనం ఆ వ్యక్తిని క్షమిస్తాము. దీనినే మనం పునరుద్ధరణ న్యాయం అని పిలుస్తాము. ఇది పరిణామాలను తుడిచివేయదు. తప్పు చేయడం వల్ల దెబ్బతిన్న దానిని పునరుద్ధరించడానికి ప్రయత్నిస్తుంది. బాధితునికి రక్షణ, సత్యం, న్యాయం మరియు స్వస్థత పొందే హక్కు ఉంది. అపరాధి సరే మానవ గౌరవాన్ని మరియు పునరావాసం పొందే అవకాశాన్ని నిలుపుకుంటాడు (గౌదియమ్ ఎత్ స్పెస్, 26, 29). మన క్షమాపణ సంబంధాలను బాగుచేయాలని, మన న్యాయం బలహీనులను రక్షించాలని మరియు మన కరుణ మన ప్రపంచానికి క్రీస్తు ముఖాన్ని వెల్లడి చేయాలని ఆశిస్తున్నాము.

 

“మనం జీవిస్తే ప్రభువు కోసమే జీవిస్తాము. మనం చనిపోతే ప్రభువు కోసమే చనిపోతాము. కాబట్టి, మనం జీవించినా, చనిపోయినా ప్రభువుకే చెందినవారము (రోమా 14:8).